जनकपुरमा कुकुर जुलुस

पुरन साह, जनकपुरधाम, १२ भदौ । राष्ट्रिय मधेस समाजवादी पार्टीको विद्यार्थी संगठन समाजवादी विद्यार्थी संघले जनकपुरमा कुकुर जुलुस प्रदर्शन गरेको छ । संविधानको मस्यौदाको विरोधमा आन्दोलनकै क्रममा समाजवादी विद्यार्थी संघले पृथक किसिमको विरोध जुलुस आयोजना गरेको हो । रामसपाको जनकपुर भानुचौकस्थित पार्टी कार्यालयदेखि कुकरसहितको जुलुस नगरको विभिन्न भागको परिक्रमा गर्दै जनक चौकमा गएर कोणसभामा परिणत भएको थियो ।

विद्यार्थी संघका अध्यक्ष ज्ञानेन्द्र झाको नेतृत्वमा निस्केको जुलुसले प्रमुख दलका नेताहरुको विरोधमा नाराबाजी गर्दै प्रदर्शन गरेको थियो । मधेशमा जारी आन्दोलन हिंसात्मक हुँदै गएपनि मुख्य दलका नेताहरुले जनताको आन्दोलन र जनजविनप्रति कुनै चासो नदेखाएकोप्रती विद्यार्थीहरु आक्रोसित देखिन्थे ।

जुलसमा रामसपाबाट सभासद रहेका जनकपुरका व्यापारी दिनेश साहको पनि सहभागिता रहेको थियो । मधेश तनावग्रस्त हुँदै गएपनि मुख्य दलका चार नेताहरु बोल्न नसक्ने लाटो, सुन्न नसक्ने बहिरो र देख्न नसक्ने अन्धो भएर बसेकाले कुकुर जुलुस निकालिएको प्रदर्शनकारीले बताएका छन् ।
उनीहरुले प्रधानमन्त्री कोइरालालाई लाटो, केपी ओलीलाई बहिरो, गृहमन्त्री बामदेव गौतमलाई अन्धो र सभामुख सुवासचन्द्र नेम्वाङ्गलाइ लापहरवाको संज्ञा दिएको तस्विरसहित जुलुस प्रदर्शन गरे । संयुक्त लोकतान्त्रिक मधेशी मोर्चामा आवद्व नरहेपनि जारी अनिश्चितकालिन बन्दको रामसपाले विभिन्न दबाबमुलक कार्यक्रम गरि समर्थन गर्दै आएको छ ।