रक्षाबन्धनको अवसरमा शनिबार मधेशका बजारहरु खुल्ला

हुलाकी न्यूज, काठमाडौं, १२ भदौ । मधेशमा जारी अनिश्चितकालिन बन्द र आन्दोलनकै बिच शनिबार भने बजारहरु खुल्ला छ । शनिबार परेको रक्षाबन्धनलाई ध्यानमा राख्दै अधिकांश जिल्लाका बजार र पसल खोल्न दिने आन्दोलनरत संयुक्त लोकतान्त्रिक मधेशी मोर्चाले जनाएको छ ।
जनकपुर, वीरगंज, नेपालगंजलगायतका मुख्य सहरहरुमा रक्षाबन्धनको अवसरमा बजार खुलेका छन् ।

संयुक्त लोकतान्त्रिक मधेशी मोर्चा, धनुषाले रक्षाबन्धन पर्वको लागि भनेर शुक्रवार दिउँसो ३ बजेदेखि शनिवार सम्मका लागि बजार खुल्ला गर्ने निर्णय गरेको छ । जनकपुर उद्योग वाणिज्य संघको विशेष आग्रहमा मोर्चाले शुक्रबार तीन बजेदेखि शनिवार दिनभरिका लागि बजार खोल्ने निर्णय गरेको हो ।

सदभावना पार्टीका जिल्ला अध्यक्ष संजय कुमार सिंहले बजार खुलेपनि सवारी सधानहरु बन्द रहने बताए । उनले शनिवार राजमार्ग केन्द्रित आन्दोलन हुने बताएका छन् । बजार बन्द वाहेक विरोधका अन्य कार्यक्रमहरु भने यथावत रहने सिंहले जनाए । मोर्चाको घटक दलका सबै अध्यक्षहरुसँग जनकपुर उद्योग वाणिज्य संघका अध्यक्ष शिवशंकर साहसहितका व्यवसायिहरुको शुक्रवार विहान बसेको बैठकले रक्षाबन्धन पर्वको विशेष अवसरमा बजार खोल्ने निर्णय गरेको छ ।